"Ливерпуль"нинг ҳужумкор ярим ҳимоячиси Доминик Собослаи Европанинг икки гранди эътиборида турибди. Бу ҳақда Hir TV хабар бермоқда.

Манбага кўра, 25 ёшли венгрияликнинг хизматларига "Манчестер Сити" ва Мадриднинг "Реал" клублари қизиқиш билдирмоқда. Гап шундаки, Собослаининг "Ливерпуль"даги маоши йилига 7 млн евро атрофида бўлиб, бу унинг позициясида ўйнайдиган бошқа юлдузлар билан солиштирганда жуда кам. Таъкидланишича, мерсисайдликлар футболчи билан янги узоқ муддатли шартнома тузиш ва жамоа натижаларига жиддий ҳисса қўшгани учун уни яхши маош билан тақдирлашни мақсад қилган.

Жорий мавсумда Собослаи барча турнирларда 15 та ўйинда майдонга тушиб, 2 та гол урди ва 5 та голли узатмани ўз ҳисобига ёздириб қўйди.