«Бунёдкор» - «Динамо» (1:3) учрашувида жамоанинг асосий икки марказий ҳимоячиси Олександр Кучеренко жароҳат, Жаҳонгир Ўрозов эса дисквалификация сабаб майдонга туша олмагач, бош мураббий Вадим Абрамов Марко Станоевични ҳимояда ўйнатишга мажбур бўлди ва сербиялик тажрибали легионер ишончни оқлади.

Ўйиндан кейин Марко клуб матбуот хизматига ўйин борасидаги фикрларини билдирди.

«Бу ўйин 2-даврада асосий таркибда бошлаган биринчи ўйиним бўлди. Бугун марказий ҳимояда ўйнашимга тўғри келди. Бу ёшда исталган позицияда ўйнашим мумкин, камроқ хато қилиб, кўпроқ ўзимдан ёши кичикларга ёрдам беришга интилдим. Ғалаба қозондик, демак ҳаммаси яхши чиқди.

Кучеренко ва Ўрозов нуқтасидаги ўйин? Уларнинг ўрнини тўлдириш қийин. Бутун мавсум давомида улар кўп тер тўкишди, яхши ҳаракат қилишмоқда. Афсуски, бугунги ўйинда майдонга туша олишмади. Ҳозир қайси чизиқда ўйнашим муҳим эмас, жамоанинг ғалаба қозониб, олға юришда давом этиши муҳимроқ.

Имконият? Албатта, бор. Муваффақиятга эришиш учун охиригача курашамиз. «Бунёдкор» осон рақиб эмас, биринчи даврадаги ўйинда бизда ҳеч нарса чиқмаганди, бугун эса юта олдик. Шукрки, муҳим баҳсда ғалаба қозондик», - дейди Марко Станоевич ўйиндан кейин.