Испания ирқчилик ва миллатлараро нафратни кузатув маркази (ОBERAXE) ҳисоботига кўра, испан ижтимоий тармоқларида аниқланган ирқчиликка оид ҳақоратларнинг 60 фоизи “Барселона” ҳужумчиси Ламин Ямалга қаратилган. Бу ҳақда El Pais нашри хабар берди.

Унга кўра, Ямал Испанияда ирқчиликка энг кўп учраётган футболчи сифатида қайд этилмоқда. Унинг номига ёзилган ҳақоратлар “Реал Мадрид” ҳужумчиси Винисиус Жуниорникидан қарийб икки баравар кўп.

Ижтимоий тармоқлардаги бундай ҳужумлар Парижда ўтган “Олтин тўп” маросимидан сўнг янада кучайган. Ўша пайтда айрим фойдаланувчилар футболчини “ноқонуний муҳожир” деб ҳақорат қилган. Мутахассисларнинг фикрича, бу ҳолатлар тасодифий эмас. Улар Испанияда этник келиб чиқиш, тери ранги ва дин асосидаги камситишлар давом этаётганини кўрсатмоқда. Ямал Испанияда туғилган ва испан фуқаролигига эга бўлса-да, унинг келиб чиқиши марокашлик бўлгани учун ҳануз унга нисбатан ҳақоратомуз муносабатлар бўлмоқда.

Маълумот учун, жорий мавсумда 18 ёшли футболчи “Барселона” сафида жами 10 та ўйинда майдонга тушиб, ўз ҳисобига 5 та гол ва 4 та голли узатма ёздириб қўйган. Унинг каталонияликлар билан шартномаси 2032-йилгача амал қилади. Transfermarkt портали вингернинг қийматини 200 миллион еврога баҳолаган.