"Наполи" раҳбарияти жамоа бош мураббийи Антонио Конте билан учрашув ўтказади. Бу ҳақда журналист Маттео Моретто ўз ижтимоий тармоқларида маълум қилди.
Учрашув 10 ноябрь куни бўлиб ўтиши керак. Сўнгги ўйинлардаги натижалардан норози бўлган жамоа хўжайини Аурелио Де Лаурентис Конте билан ҳамкорликни давом эттириш ёки эттирмаслик масаласини муҳокама қилади. "Наполи"нинг ўйини батафсил таҳлил қилиниши кутилмоқда.
Неапол клуби барқарор натижалар кўрсатмаяпти. Барча турнирлардаги сўнгги 10 та ўйинда атиги 4 та ғалаба қайд этилган. Жамоа Италия чемпионатида пешқадамликни йўқотди ва Чемпионлар Лигасида ПСВга 2:6 ҳисобида ютқазди.
