Германия терма жамоаси бош мураббийи Юлиан Нагельсман “Ливерпуль”нинг 2025/26 йилги мавсумдаги беқарор ўйини Флориан Вирцнинг ҳолатига салбий таъсир кўрсатиши мумкинлигини таъкидлади ҳамда "қизиллар" футболчиларини 22 ёшли ярим ҳимоячи яратаётган вазиятлардан фойдаланишга чақирди.

“Ростини айтсам, Фло учун бу ҳолат осон эмас. Жамоа ўтган йилдагидек барқарор эмас, шундай экан, унга ўйинга мослашиш анча қийин. Агар "Манчестер Сити"га қарши ўйинни кўрган бўлсангиз, "Ливерпуль" деярли бутун 90 дақиқа давомида заифроқ кўринди. Шунинг учун Вирцга ҳам оғир бўлди,” — деди Нагельсман.

Унинг сўзларига кўра, бу “оддий ҳолат” — Премьер-лигада кўплаб янги футболчилар аввалги даражани дарҳол намойиш эта олмайди.

“Биз унинг имкониятларини яхши биламиз. Бу ёшда кичик пасайиш даври бўлиши табиий. Биз ундан ҳар доим бир хил даражадаги ўйин кута олмаймиз. Ҳозир энг муҳими — уни қўллаб-қувватлаш. Шу орқали у терма жамоада қайта руҳланиши, "Ливерпуль" эса унинг яратаётган имкониятларини голга айлантира олиши мумкин,” — дея қўшимча қилди Нагельсман.

Вирц жорий мавсумда “Ливерпуль” сафида барча мусобақаларда 16 та ўйинда иштирок этди ва 3 та голли узатма амалга оширди.