Испания терма жамоаси бош мураббийи Луис де ла Фуэнте "Барселона" билан манфаатлар тўқнашуви ҳақидаги саволга жавоб берди.
"Кўк-анорранглилар" футболчилари терма жамоа сафида тез-тез жароҳат олишган. Тахминларга кўра, "қизил фурия" мураббийлар штаби Каталония клуби вакилларининг чарчаган футболчиларнинг юкламасини меъёрлаштириш бўйича илтимосларини эътиборсиз қолдирган.
"Биз "Барса" билан жанг қилмаймиз. Барчамиз бир нарсани - натижага эришишни хоҳлаймиз. Бизнинг умумий манфаатларимиз бор. Мен "Барселона"нинг қарорларини ҳурмат қиламан, аммо менинг қарорларим ҳам ҳурмат қилинишини истайман", - дея де ла Фуэнтенинг сўзларини келтиради Barca Universal.
Ноябрь ойида испанлар Грузия (15.11) ва Туркия (18.11) терма жамоаларига қарши ўйнайди.
