"Ливерпуль" марказий ҳимоячи Ибраима Конатедан жавобни узоқ кутмоқчи эмас. Французнинг амалдаги шартномаси жорий мавсум якунлангач ўз ниҳоясига етади ва "қизиллар" раҳбарияти ҳозирча футболчини янги шартнома тузишга кўндира олгани йўқ. Caught Offside хабарига кўра, "Ливерпуль" Конатага агар у яқин орада келишувни узайтиришга розилик бермаса, трансферга қўйилиши ҳақида огоҳлантирган.
Клубдагилар вазиятни тезроқ ойдинлаштириб, керак бўлса, 26 ёшли марказий ҳимоячига ўринбосар қидириш бўйича иш бошламоқчи. Мерсисайдликларга "Кристал Пэлас" футболчиси Марк Гехи қизиқ, унинг ҳам шартномаси келаси ёзгача мўлжалланган.
