"Манчестер Сити" Клаудио Эчеверрини "Байер"даги ижарасидан чақириб олиши мумкин.
Август ойида немис клуби "шаҳарликлар"нинг 19 ёшли ярим ҳимоячисини бир йиллик ижарага олди.
Манчестерликлар бу мавсумда аргентиналик футболчи Бундеслигада ўйинчи сифатида ривожланишига умид қилишганди. Аммо ҳозирча футболчи "Байер" сафида атиги 8 та ўйинда майдонга тушиб, барча мусобақаларда жами 240 дақиқа ўйнади. Унинг ҳисобида битта голли узатма бор.
Bild нашри хабарига кўра, Пеп Гвардиола Эчеверрига ўйин дақиқалари етишмаётганидан "асабийлашган", "Сити" эса умуман вазиятдан ҳафсаласи пир бўлган.
Хабар қилинишича, "Байер" ва "Ман Сити" вакиллари тез орада учрашиб, хавбекнинг келажагини муҳокама қилишади. Bild нашрининг таъкидлашича, Эчеверри январь ойида Манчестерга қайтиши мумкин.
Қайд этилишича, клублар келишувида томонларга ижарани муддатидан олдин тўхтатиш имконини берувчи банд бор.
