Италия терма жамоаси бош мураббийи Женнаро Гаттузо ЖЧ-2026 саралашидан ўрин олган Норвегия термасига қарши уй учрашувидаги мағлубиятга (1:4) муносабат билдирди.
"Биринчи навбатда мухлисларимиздан узр сўрашимиз керак, чунки 1:4 - бу оғир натижа. Алам қилади, ахир биринчи бўлим жуда яхши ўтди, биз ҳақиқий жамоа эдик, лекин асосий кўнгилсизлик шундаки, иккинчи бўлим бу даражага мос келмади.
Норвегияни табриклайман. Танаффусдан кейин бизда жиддий муаммолар пайдо бўлди.
Даражамизни йўқотиб қўйдик. Биринчи бўлимда тўғри прессинг қилдик, аммо кейин тўпни йўқота бошладик, Норвегияга бўшлиқ бердик. Тўпни йўқотдик, узатмаларда хато қилдик - мана нима бўлди," - дея италиялик мураббийнинг сўзларини келтиради RAI Sport.
