АҚШ ҳукумати томонидан жорий этилган саёҳат тақиқи туфайли Гаити терма жамоасининг кўплаб ишқибозлари жаҳон чемпионатига бора олмайди. Гаити терма жамоаси 1974 йилдан бери биринчи марта ушбу турнирга йўлланма олганди.

Июнь ойида АҚШ президенти Дональд Трамп 12 та давлатга саёҳат тақиқини имзолади. У бу чорани миллий хавфсизликни ҳимоя қилиш учун зарур деб атади. Эълон қилинган рўйхатда Гаити фуқароларининг АҚШга кириши тақиқланган. Бу ҳақда The Athletic хабар берди.

Ҳужжатда айтилишича, Гаитининг турли визалар билан АҚШга кирган фуқаролари рухсат этилган муддатдан ортиқ қолиш кўрсаткичлари юқори бўлган. Гаити 2021 йилда президенти Жовенел Моиз ўлдирилганидан бери сиёсий инқироз ҳолатида.

Гаити миллий терма жамоаси саралаш ўйинларини бошқа мамлакатларда ўтказди. Никарагуа устидан ҳал қилувчи ғалаба Кюрасао оролида қўлга киритилди. Футболчиларнинг АҚШ ҳудудига киришда муаммоси бўлмайди, чунки фармонда айрим тоифалар учун истиснолар мавжуд.

Тақиққа қарамай, АҚШда аллақачон 850 минг кишилик гаити диаспораси мавжудлиги сабабли Гаити мухлислари албатта стадионларда бўлади.