AQSH hukumati tomonidan joriy etilgan sayohat taqiqi tufayli Gaiti terma jamoasining ko‘plab ishqibozlari jahon chempionatiga bora olmaydi. Gaiti terma jamoasi 1974 yildan beri birinchi marta ushbu turnirga yo‘llanma olgandi.
Iyun oyida AQSH prezidenti Donald Tramp 12 ta davlatga sayohat taqiqini imzoladi. U bu chorani milliy xavfsizlikni himoya qilish uchun zarur deb atadi. E’lon qilingan ro‘yxatda Gaiti fuqarolarining AQSHga kirishi taqiqlangan. Bu haqda The Athletic xabar berdi.
Hujjatda aytilishicha, Gaitining turli vizalar bilan AQSHga kirgan fuqarolari ruxsat etilgan muddatdan ortiq qolish ko‘rsatkichlari yuqori bo‘lgan. Gaiti 2021 yilda prezidenti Jovenel Moiz o‘ldirilganidan beri siyosiy inqiroz holatida.
Gaiti milliy terma jamoasi saralash o‘yinlarini boshqa mamlakatlarda o‘tkazdi. Nikaragua ustidan hal qiluvchi g‘alaba Kyurasao orolida qo‘lga kiritildi. Futbolchilarning AQSH hududiga kirishda muammosi bo‘lmaydi, chunki farmonda ayrim toifalar uchun istisnolar mavjud.
Taqiqqa qaramay, AQSHda allaqachon 850 ming kishilik gaiti diasporasi mavjudligi sababli Gaiti muxlislari albatta stadionlarda bo‘ladi.
