"Манчестер Сити" устози Хосеп Гвардиола жамоанинг собиқ яримҳимоячиси Фернандиньо фаолиятини якунлагани ҳақида гапирди.

Бразилиялик футболчи 2013 йилдан 2022 йилгача "шаҳарликлар" шарафини ҳимоя қилган. Куни кеча 40 ёшли хавбек бутсаларини михга илишга қарор қилганини маълум қилди.

"Ажойиб хотиралар. Ўша даврнинг ўзига хос футболчилари менинг қалбимда абадий қолади ва Фернандиньо улардан бири. Ўн йил олдин бу ерга келганимда у менга катта ёрдам берган. У ажойиб футболчи эди. У фаолиятини якунлагач, футбол билан боғланишига деярли ишончим комил. Ҳамма кетаётганда бир хил гапиради: "Оилам билан, болаларим билан бўлишни истайман," лекин бир неча кундан кейин у ўзига ўзи савол бера бошлайди: "Кейин нима бўлади?" Топ-даражадаги бундай ўйин тажрибасига эга одам футболга керак, у янги авлодларга кўп нарса бера олади", - дея Гвардиоланинг сўзларини келтиради City Report.