Англия Премьер-лигаси (АПЛ) клублари маошларнинг юқори чегарасини жорий этиш таклифига қарши овоз берди, деб ёзади BBC. Шу билан бирга, таркиб учун харажатлар коэффициентини (SCR, Squad Cost Ratio) жорий этиш минимал зарур квота билан қўллаб-қувватланди.

Манбага кўра, АПЛда маошлар чегарасини белгилаш масаласи бўйича овоз беришда еттита клуб вакиллари "ҳа," 12 таси "йўқ" деган, бир иштирокчи бетараф қолган.

SCR бўйича овоз беришда 14 та "маъқул" овоз тўпланди, бу янги қоидани қабул қилиш учун чегаравий миқдор ҳисобланади. АПЛнинг олтита клуби бунга қарши овоз берди.

Қабул қилинган янгиликка кўра, 2026/2027 йилги мавсумдан бошлаб клублар таркибининг умумий харажатлари (ўйинчилар ва мураббийлар штаби маоши, шунингдек, трансфер йиғимлари ва агентларнинг комиссия тўловларини ўз ичига олган ҳолда) клуб даромадларининг 85 фоизи билан чекланади. Шу билан бирга, еврокубокларда иштирок этадиган клублар учун бу кўрсаткич ҳар қандай ҳолатда ҳам УEФА талабларига мувофиқ 70 фоизни ташкил этади.