"Ливерпуль" "Ноттингем Форест" ярим ҳимоячиси Эллиот Андерсонга қизиқиш билдирмоқда. Аммо футболчининг ўзи "Манчестер Юнайтед"га ўтиб, Рубен Аморим қўл остида ишлашни истамоқда. Бу ҳақда TEAMtalk хабар бермоқда.
Манбага кўра, 23 ёшли футболчи "қизил иблислар"нинг асосий трансфер мақсади ҳисобланади. "Ўрмончилар" Андерсон трансфери учун 120 млн фунт стерлинг (136,8 млн евро) талаб қилмоқда, аммо манкунианликлар 60 млн фунт (68,4 млн евро) эвазига келишувга эриша олишига ишонмоқда.
Ярим ҳимоячи 2024 йилнинг ёзида "Ньюкасл"дан "Ноттингем Форест"га ўтганди. Бу вақт ичида Андерсон барча турнирларда 56 та ўйинда майдонга тушиб, 3 та гол ва 7 та голли узатмани амалга оширди. Футболчининг клуб билан амалдаги меҳнат шартномаси 2029 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 45 млн еврони ташкил этади.
