Душанба куни AS нашрининг саҳифаларида "Реал" жамоасидаги вазият ҳақида мақола чоп этилди. Бундан бир кун олдин Мадрид жамоаси "Эльче" билан сафарда 2:2 ҳисобида дуранг ўйнаганди.
"Реал" "эл-класико"даги ғалабадан сўнг ўзини йўқотиб қўйди", - дея хулоса чиқаради муаллиф, журналист Хосе Феликс Диас. Унинг ёзишича, илгари ҳамма "Реал" рақибларидан кўпроқ югуришини ва фаол прессинг қилишини таъкидлаган бўлса, энди буларнинг барчаси йўққа чиққан.
"Клубдагилар футболчилар ва мураббийлар жамоаси ўртасидаги алоқа узилганини ёки ҳеч бўлмаганда жиддий даражада зарар кўрганини тан олишни истамаяпти. Бу раҳбариятни ташвишга солмоқда," - дейилади мақолада.
"Реал" раҳбарларини ҳайрон қолдираётгани шуки, ҳатто жамоа етакчилари ҳам дастлабки қийинчиликларга дуч келганда руҳдан синиб қолмоқда.
"Реал" Ла Лигада пешқадамлик қилмоқда, бироқ "Барселона" ундан атиги бир очко орқада турибди.
