Dushanba kuni AS nashrining sahifalarida "Real" jamoasidagi vaziyat haqida maqola chop etildi. Bundan bir kun oldin Madrid jamoasi "Elche" bilan safarda 2:2 hisobida durang o‘ynagandi.
"Real" "el-klasiko"dagi g‘alabadan so‘ng o‘zini yo‘qotib qo‘ydi", - deya xulosa chiqaradi muallif, jurnalist Xose Feliks Dias. Uning yozishicha, ilgari hamma "Real" raqiblaridan ko‘proq yugurishini va faol pressing qilishini ta’kidlagan bo‘lsa, endi bularning barchasi yo‘qqa chiqqan.
"Klubdagilar futbolchilar va murabbiylar jamoasi o‘rtasidagi aloqa uzilganini yoki hech bo‘lmaganda jiddiy darajada zarar ko‘rganini tan olishni istamayapti. Bu rahbariyatni tashvishga solmoqda," - deyiladi maqolada.
"Real" rahbarlarini hayron qoldirayotgani shuki, hatto jamoa yetakchilari ham dastlabki qiyinchiliklarga duch kelganda ruhdan sinib qolmoqda.
"Real" La Ligada peshqadamlik qilmoqda, biroq "Barselona" undan atigi bir ochko orqada turibdi.
