"Эвертон" ярим ҳимоячиси Идрисса Гейе Англия чемпионати 12-туридан ўрин олган "Манчестер Юнайтед"га (1:0) қарши сафар ўйинида қизил карточка олганидан сўнг узр сўради.
36 ёшли сенегаллик футболчи жамоадоши Майкл Кин, шунингдек, бошқа футболчилар, мураббийлар штаби, мухлислар ва клубдан узр сўради. У ўз реакцияси учун жавобгарликни тўлиқ ўз зиммасига олишини айтди.
"Бўлган воқеалар менинг асл фазилатларим ва тамойилларимни акс эттирмайди. Ҳис-туйғулар баъзан устун келади, лекин ҳеч нарса бундай хатти-ҳаракатни оқламайди. Бу ҳеч қачон такрорланмаслиги учун ҳамма нарсани қиламан," - деб ёзди футболчи ижтимоий тармоқда.
Гейе "Манчестер Юнайтед"га қарши ўйиннинг 13-дақиқасида ҳимоячи Майкл Кин билан зиддиятдан сўнг майдондан четлатилди. У ўз шеригининг юзига тарсаки туширди.
