"Everton" yarim himoyachisi Idrissa Geye Angliya chempionati 12-turidan o‘rin olgan "Manchester Yunayted"ga (1:0) qarshi safar o‘yinida qizil kartochka olganidan so‘ng uzr so‘radi.

36 yoshli senegallik futbolchi jamoadoshi Maykl Kin, shuningdek, boshqa futbolchilar, murabbiylar shtabi, muxlislar va klubdan uzr so‘radi. U o‘z reaksiyasi uchun javobgarlikni to‘liq o‘z zimmasiga olishini aytdi.

"Bo‘lgan voqealar mening asl fazilatlarim va tamoyillarimni aks ettirmaydi. His-tuyg‘ular ba’zan ustun keladi, lekin hech narsa bunday xatti-harakatni oqlamaydi. Bu hech qachon takrorlanmasligi uchun hamma narsani qilaman," - deb yozdi futbolchi ijtimoiy tarmoqda.

Geye "Manchester Yunayted"ga qarshi o‘yinning 13-daqiqasida himoyachi Maykl Kin bilan ziddiyatdan so‘ng maydondan chetlatildi. U o‘z sherigining yuziga tarsaki tushirdi.