Португалия терма жамоаси бош мураббийи Роберто Мартинес нега Криштиану Роналдуга ишонишда давом этаётгани ва 40 ёшли форвардни асосий таркибда тушираётганини тушунтирди.

"Роналду ҳақида ҳар кимнинг ўз фикри бор. Лекин мен бир нарсани кўряпман: биз ғалаба қозонганимизда ва Криштиану бир ёки икки гол урганида, матбуот "Роналду ўйинни тугатганида нима қиласизлар? Жамоа унга жуда боғлиқ". Агар у гол ура олмаса, савол бошқача бўлади: "Агар таркибингизда 40 ёшли ўйинчи бўлса, қандай қилиб ғалаба қозонмоқчисиз?"

Биз учун ҳаммаси анча осон. У сўнгги 30 ўйинда 25 та гол ургани учун ўйнамоқда. Унинг статистикаси ақл бовар қилмайди. У терма жамоа ихтиёрига келганида профессионаллик, ишга бўлган муносабат ва ҳар куни яхшироқ бўлишга интилиш намунаси бўлади. У эркаклар футболи тарихида миллий терма жамоа сафида 227 та ўйин ўтказган ягона футболчи ҳисобланади.

Ҳозир хулқ-атвор кўп нарсани ҳал қилади. Халқаро футболда ҳеч ким бекорга ҳеч нарса олмайди. Ҳар бир ўйинчи ниҳоятда рақобатбардош. Аммо голлардан ташқари, биз Криштианудан аввалгидек спорт очлигини оламиз. Роналду футболчи сифатида ўзгарди. У энди биз эслайдиган 18-19 ёшли вингер эмас, аммо унинг муносабати ва мамлакат учун ўйнаш истаги уни кийиниш хонасида юқумли кайфиятнинг ажойиб манбасига айлантиради", - деди Мартинес Sky Sports’га берган интервьюсида.