Ҳиндистонда ўтган шахмат бўйича ФИДЕ Жаҳон кубогида ғалаба қозонган ҳамюртимиз Жавоҳир Синдоров пойтахтимизга қайтиб келди. Гроссмейстеримизни Ўзбекистон Республикаси Бош вазири Абдулла Арипов бошчилигидаги Спорт вазирлиги, МОҚ, Ёшлар ишлари агентлиги ва мамлакат шахмат федерацияси раҳбарияти, катта спорт жамоатчилиги тантанали кутиб олди.
Расмийлар Жавоҳирнинг юксак муваффақияти мамлакатимиз шахмат мактабининг нуфузи ва халқаро майдондаги ўрнини янада юксалтирганини таъкидлаб, унга жаҳон тожи учун кечадиган турнирда ҳам омад тилашди.
Шунингдек, Бош вазир Жавоҳир Синдоровни "Ўзбекистон Республикасида хизмат кўрсатган спортчи" фахрий унвони билан тақдирлаш ҳақидаги Президент Фармонини ўқиб эшиттирди. Тадбир давомида шахматчимизга Президент совғаси – 3 хонали уй ва пул мукофоти тантанали равишда топширилди.
Ўз навбатида, Синдоров келгусида ушбу натижа билан тўхтаб қолмай, янги марраларни забт этишга бел боғлаганини таъкидлади.
