Йилдан йилга ўлкамизда аёллар футболига эътиборнинг ошаётгани бор гап.
Вазирлар Маҳкамасининг қарорига биноан бу йилдан олий лига клублари қошида аёллар жамоасини ташкил қилиш мажбурияти юкланди. Гарчи биринчи лигада иштирок этаётган бўлишига қарамай, “Машъал” ҳам футбол бўйича аёллар жамоасини тузишга киришди. Айни пайтда “Машъал-W” деб юритилаётган қизлар жамоасининг жуда кўпчилик футболчилари Ўзбекистон ўсмирлар терма жамоасига (U-16) номзод ҳисобланади. Бу ёшдаги терма жамоанинг бош мураббийи Гулнора Аъзамова. “Машъал-W” бош мураббийи Баҳром Норсафаров эса терма жамоада катта мураббий сифатида фаолият олиб бормоқда.
Терма жамоага номзод сифатида қаралаётган “Машъал-W”нинг 17 нафар футболчиси бош мураббий ҳамроҳлигида Тошкентга йўл олишди. Баҳром Норсафаровнинг айтишича, шу кунларда ўсмирлар термаси аввалига Чирчиқда, кейин пойтахтда йиғин ўтказади. Йиғин ўтказишдан мақсад, ўсмирлар жамоаси аъзолари 2 августда Иорданияга учиб кетишади. Чунки у ерда ўсмирлар ўртасида халқаро турнир ўтказилади. Бунда Ўзбекистон ўсмирлар терма жамоаси ҳам иштирок этади.
“Турнирга жами 23 нафар футболчи олиб кетилади, - дейди Б.Норсафаров. – Шулардан 17 нафари “Машъал”дан. Қолган қизлар бошқа клублардан таклиф этилган. Мана шу турнир туфайли олий лиганинг иккинчи босқич ўйинларига бироз кечроқ киришамиз. Тақвимга кўра 3 август куни “Севинч” билан ўйнашимиз лозим эди, аммо бу ўйин 16 августга қолдирилди. Шу боис олий лигадаги биринчи ўйинни 11 август куни Муборакда “Кизилкумочка”га қарши ўтказамиз”.
Яна бир гап. Аёллар футболи бўйича Ўзбекистон ўсмирлар терма жамоаси шу йилнинг 26 сентябрь – 6 октбярь кунлари кунлари ўтказиладиган Осиё чемпионатида қатнашади. Хитой мезбонлик қиладиган мазкур мусобақада Гулнора Аъзамова ва Баҳром Норсафаров шогирдлари “С” гуруҳида Жанубий Корея ва Таиландга қарши тўп суришади. Мусобақа формати қуйидагича: Ўсмирлар ўртасидаги Осиё чемпионатида жами 12та жамоа учтадан тўрт гуруҳга бўлинган. Турнирда кучли учликдан жой эгаллаган жамоалар келаси йил Коста Рикада бўлиб бўтадиган жаҳон чемпионатига йўлланмани қўлга киритишади.
