Сербия, Польша, Венгриядаги футбол клублари футбол бўйича Ўзбекистон чемпионати баҳсларини «зерикарли» деб баҳолашди. Бу ҳақда, россиялик футбол агенти Олег Малежик маълум қилди.
Олег Малежик россиялик таниқли футбол агентларидан бири ҳисобланади. Sports.ru интернет-нашри маълумотларига кўра, унинг энг машҳур мижозлари орасида Сергей Бризгалов («Спартак»), Игорь Смолников («Краснодар»), Эмин Маҳмудов («Крилья Советов») сингари футболчилар бор. Малежикнинг фикрича, Россия клубларида пул кўпайиб, улар асосий эътиборни Европа ва Лотин Америкасидаги футболчиларга қаратишни бошлашган, шунинг учун ҳам ўзбекистонлик футболчиларга бўлган талаб камайиб кетган. Жумладан, россиялик агент ўзбекистонлик футболчиларнинг савияси ҳақида кескин фикрлар билдирган.
«Ўзбек футболчилари савиясини олайлик. Кескин фикр билдиришимга ҳафа бўлмайсиз, деган умиддаман. Мисол учун, ўтган мавсумда аутсайдер «Алания»да ҳам мустаҳкам ўрин эгаллай олмаган Санжар Турсунов сизларда 2012 йилнинг энг яхши футболчиси деб топилди. Бундан ўзингиз тегишли хулоса чиқариб олаверинг», – дейди Малежик.
Агентнинг қайд этишича, Ўзбекистон жамоалари мунтазам Осиёда ўйнагани учун ҳам, ўзбекистонлик футболчиларни Осиёда танишади ва улар шунинг учун ҳам Яқин ва Узоқ Шарқ клубларида тўп суришади. «Мени маъзур тутасиз-у, мухлисларингизга ўз кучларингизни меъёридан ортиқча баҳоламанг, деган бўлардим. Ҳа, Ўзбекистон жамоалари Осиёда секин-аста катта натижаларга эришишмоқда. Аммо жаҳон миқёсида ҳозирча ҳеч қандай оламшумул натижангиз йўқ», – деди Малежик.
Агентнинг таъкидлашича, у ўзбекистонлик футбол агенти билан ҳамкорликда, Ўзбекистон миллий терма жамоасига номзод Фозил Мусаев, Ислом Тўхтахўжаев, Жасур Ҳасанов («Бунёдкор»), Акмал Шораҳмедов, Дилшод Раҳматуллаев каби футболчиларни Россиянинг «Терек», «Кубань» каби ўртамиёна жамоаларига тавсия қилишган. «Биласизми, улар футболчиларингизни ҳатто кўрикка ҳам чақиришга қизиқишмаяпти. Бундан ташқари, таклифларимизга 1-дивизион жамоалари ҳам совуқ муносабат билдиришди», – деди Малежик.
«Видеоматериалларни Сербия, Польша, Венгриядаги клублар ва мутахассисларга етказдим. Бироқ уларда ҳам ўзбек клублари ва футболчилари илиқ таассурот қолдиришмади. Миллий чемпионатингиз ўйинларини бу экспертлар зерикарли, паст тезликда кечадиган, ўйинчилар кўп бракларга йўл қўядиган экан деб баҳолашибди. Ўзим ҳам кўриб чиққан ДВД-дисклардан гувоҳ бўлдимки, стадионларингиз деярли бўм-бўш. Демак, учрашувлар, улардаги кураш, футболчиларнинг ҳаракатлари мухлисларни ўзига тортмайди», – дея қўшимча қилган Олег Малежик.
Қайд этиш жоиз, сўнгги бир ҳафталар давомида бир қатор ўзбекистонлик футболчилар хориж клубларига ўтгани ҳақида хабарлар тарқалди. Жумладан, Ўзбекистон миллий терма жамоасига номзод ярим ҳимоячилардан бири, қишда Мадриднинг «Атлетико» клубига ўтиши ҳақида хабарлар тарқалган Фозил Мусаев Қатарнинг «Ал-Муъайзир» клубига ўтди. Июль ойи ўрталарида эса Ўзбекистоннинг 2012 йилдаги энг яхши футболчиси деб топилган «Локомотив» ярим ҳимоячиси Санжар Турсунов Россия 1-дивизионида иштирок этувчи Оренбургнинг «Газовик» клубига ўтгани ҳақида хабар берилди.
