«Реал» клуби ўзининг расмий сайтида баёнот эълон қилди. Мадрид клубининг маълум қилишича, ҳужумкор ярим ҳимоячи Николас Пас 2026/2027 йилги мавсумда ҳам «Комо» сафида тўп суришни давом эттиради.

«Қаймоқранглилар» Нико Паснинг ўзи «Комо»да қолишни илтимос қилганини алоҳида таъкидлаб ўтишди. Шу билан бирга, «Реал» бир йилдан сўнг футболчини қайта сотиб олиш ҳуқуқини ўзида сақлаб қолган.

Николас Пас «Комо» либосида ўтказган 75 та ўйинда ўз ҳисобига 19 та гол ва 17 та голли узатмани ёздириб қўйишга улгурди. Нуфузли Transfermarkt портали 21 ёшли аргентиналик иқтидор эгасини 80 миллион еврога баҳоламоқда.

Эслатиб ўтамиз, «Комо» А Сериянинг якунланган мавсумини тўртинчи ўринда якунлаб, Чемпионлар лигаси йўлланмасини қўлга киритган эди.