Мадриднинг "Реал" клуби футболчиси Родриго голсиз сериясини узайтирди. Бразилиялик футболчи Ла Лиганинг "Жирона"га қарши ўйинида 72-дақиқада захирадан майдонга тушди, аммо "қаймоқранглилар"га ғалабани илиб кетишда ёрдам бера олмади (1:1).

Эътиборлиси, 24 ёшли футболчи "Реал" сафида кетма-кет 30 ўйиндан буён гол ура олмаяпти - бу ҳужумчилар орасида клуб тарихидаги энг ёмон голсиз серияни такрорлашдир, деб хабар беради MisterChip. Илгари антирекорд фақат Мариано Диасга тегишли эди.

Таъкидлаш керакки, Родриго 30 ўйиннинг барчасида ҳам асосий таркибда майдонга тушмади, бу эса, албатта, голларга таъсир кўрсатди. Ҳужумчи "Реал"даги сўнгги голини март ойида Чемпионлар лигасида "Атлетико"га қарши ўйинда нишонлаган эди.