Madridning "Real" klubi futbolchisi Rodrigo golsiz seriyasini uzaytirdi. Braziliyalik futbolchi La Liganing "Jirona"ga qarshi o‘yinida 72-daqiqada zaxiradan maydonga tushdi, ammo "qaymoqranglilar"ga g‘alabani ilib ketishda yordam bera olmadi (1:1).

E’tiborlisi, 24 yoshli futbolchi "Real" safida ketma-ket 30 o‘yindan buyon gol ura olmayapti - bu hujumchilar orasida klub tarixidagi eng yomon golsiz seriyani takrorlashdir, deb xabar beradi MisterChip. Ilgari antirekord faqat Mariano Diasga tegishli edi.

Ta’kidlash kerakki, Rodrigo 30 o‘yinning barchasida ham asosiy tarkibda maydonga tushmadi, bu esa, albatta, gollarga ta’sir ko‘rsatdi. Hujumchi "Real"dagi so‘nggi golini mart oyida Chempionlar ligasida "Atletiko"ga qarshi o‘yinda nishonlagan edi.