Испаниялик вингер Марко Асенсио "ПСЖ"дан "Фенербахче"га ўтиши борасида ўз фикрлари билан ўртоқлашди. 7,5 миллион евролик трансфер 2025 йил сентябрь ойида амалга оширилган.
"Мавсум яхши бошланди, кейин жароҳат туфайли 2 ойга сафдан чиқдим, аммо барчасини муваффақиятли якунладик. Кейинги мавсум ҳам яхши бошланди, аммо бир кечада мураббийнинг меҳрини йўқотдим. Футболдан завқ олишни хоҳладим, шунинг учун йўл излай бошладим," - дея футболчининг сўзларини келтиради Marca.
"Менга маълум бўлишича, аниқ ҳеч нарса содир бўлмаган. Балки у бу саволга жавоб бера олар. Мен Луис Энрикени яхши биламан. Бошқа ўйинчилар ва ходимлар билан ҳам шундай бўлган. Ўз навбатида, мен гина сақламайман. Профессионал футболда шундай бўлиши мумкин - вассалом."
Жорий мавсумда футболчи клуб миқёсида 14 та ўйинда 6 та гол урди ва 2 та голли узатмани амалга оширди. 1 декабрь оқшомида унинг жамоаси мусобақа пешқадами "Галатасарой" билан куч синашади, жамоаларни 1 очко ажратиб турибди.
