Ёш ҳужумкор футболчи қидираётган Италиянинг "Милан" клуби Франция чемпионатининг энг умидли футболчиларидан бирини нишонга олди. Бу ҳақда журналист ва инсайдер Николо Скира хабар бермоқда.
Манбага кўра, гап "Анже" шарафини ҳимоя қилаётган 18 ёшли ҳужумчи Сидиқи Шериф ҳақида кетмоқда. "Россонерилар" скаут хизмати унинг ўйинларини жорий мавсум бошидан буён кузатиб келмоқда ва уни келажак учун харид сифатида кўрмоқда.
Шерифнинг "Анже" билан шартномаси 2028 йил июнигача амал қилади, бу эса унинг клубини расмий таклиф бўлган тақдирда музокаралар учун кучли позицияга қўяди.
Жорий мавсумда нархи 2 миллион еврога баҳоланаётган футболчи чемпионатнинг 14 ўйинида 3та голга муаллифлик қилган.
