Мадриднинг "Реал" клуби "Сельта" билан ўйинда нафақат мағлубиятга учради (0:2), балки кўплаб футболчиларини йўқотди.
Эдер Милитао биринчи бўлимдаёқ жароҳат олди, танаффусдан кейин Фран Гарсия ва Альваро Каррерас майдондан четлатилди. Шу тариқа, жамоа яна мудофаа позицияларида жиддий кадрлар инқирозига дуч келди: The Touchline хабарига кўра, бир вақтнинг ўзида саккиз нафар ҳимоячи Ла Лиганинг навбатдаги "Алавес"га қарши ўйинини ўтказиб юборади. Юқорида тилга олинган уч футболчидан ташқари, Дин Хёйсен, Трент Александер-Арнольд, Даниэль Карвахаль, Давид Алаба ва Ферлан Менди майдонга туша олмайди.
"Қаймоқранглилар"нинг "Алавес"га қарши ўйини келаси якшанба, 14 декабрь куни бўлиб ўтади. Бундан 4 кун олдин Хаби Алонсо жамоаси ўз уйида Чемпионлар лигаси доирасида "Манчестер Сити"ни қабул қилади.
