"Реал"нинг бразилиялик ҳужумчиси Винисиус Жуниор "Сантьяго Бернабеу"ни тарк этса, катта эҳтимол билан Саудия Арабистонига йўл олади. Бу ҳақда Football Insider нашри хабар бермоқда.
Манбага кўра, Англия премьер-лигаси клублари Винисиуснинг мураккаб феъл-атвори ва ОАВдаги мавқеи шубҳали экани сабабли уни таклиф қилишдан манфаатдор эмас. Қолаверса, АПЛ грандлари биргина трансфер туфайли жамоа ичидаги мухитни бузмоқчи эмас. Шу сабабли бразилиялик футболчининг фаолиятини давом эттириши мумкин бўлган ҳудуд Яқин Шарқ ҳисобланади.
Жорий мавсумда 25 ёшли Винисиус барча мусобақаларда 21та ўйинда майдонга тушиб, бешта гол урди ва еттита голли узатмани амалга оширди.
