"Манчестер Сити" бош мураббийи Хосеп Гвардиола Англия Премьер-лигасининг сўнгги туридаги натижалар ҳақида гапирди. Унда 2-ўриндаги "шаҳарликлар" "Сандерленд"ни мағлуб этган бўлса (3:0), пешқадам Лондоннинг "Арсенал" клуби "Астон Вилла"га ютқазди (1:2). Натижада "Сити"нинг "канонирлар" билан орадаги фарқи атиги 2 очкога қисқарди.
"Менинг тажрибамга кўра - кечирасиз, такаббур бўлиб кўринишни истамайман, лекин барибир Премьер-лига ва бошқа унвонларни қўлга киритиш тажрибам бор - гап барқарорликда. Барқарорлик эса фақат бир нарсадан - сен қандай ўйнашингдан келиб чиқади. Бир кунлик натижа ёки орадаги фарқни икки очкога қисқартириш ёки тўрт очкога олдинга ўтиб олиш имконини берган ғалабадан эмас. Барқарорлик сенинг қандай чиқиш қилишингда, йил давомида қандай ўсишингда бўлиши керак.
Бу 94 дақиқа бу мавсумдаги энг яхши ўйинларимиздан бири бўлиши мумкин. Менимча, "Арсенал" очко йўқотган тақдирда ҳам, бундай йўқотишлар жуда кам бўлади. Агар биз биринчи ўринни эгаллашни истасак, қайта-қайта ғалаба қозонишимиз керак. Ҳаммаси қандай ўйнашингга боғлиқ, шунчаки омадли кун ёки омадли ҳаракат эмас", - дея мураббийнинг сўзларини келтиради Tribuna.
