Айни кунларда АҚШда бўлиб турган ЎФА делегацияси бугун Атланта шаҳрига ташриф буюриб, жаҳон чемпионати учун ажратилган машғулот майдонлари, тренажёр заллари, меҳмонхоналар ҳамда логистика билан боғлиқ инфратузилма билан танишди.
Қайд этиш жоиз, турнир давомида ФИФА томонидан 61 та локация танланган бўлиб, улар мусобақа иштирокчиларининг истиқомат қилиши ва машғулот ўтказиши учун мўлжалланган. Жойлаштириш жараёни терма жамоаларнинг ўйинлар ўтказиладиган шаҳар ва стадионлар географиясидан келиб чиқиб белгиланади. Гуруҳ босқичи учрашувлари давомида иштирокчилар бошқа шаҳарларга махсус чартер рейслари орқали етиб бориб, ўйин якунлангач ўз базасига қайтиб келишади.













