Муҳаммад Салоҳнинг йўқлиги "Ливерпуль"га Чемпионлар Лигасида Миланнинг "Интер" клубини мағлуб этишга (1:0) халақит бермади.
Италияда Арне Слот жамоаси 88-дақиқада Доминик Собослаининг пенальтидан аниқ зарбаси эвазига 3 очкони қўлга киритди. Opta’нинг ёзишича, бу 2009 йилнинг ноябридан буён илк бор мерсисайдликлар Чемпионлар лигаси сафар ўйинида Салоҳсиз ғалаба қозонган. 16 йил муқаддам Венгриянинг "Дебретсен" жамоаси ҳам худди шу ҳисобда мағлуб этилганди.
Муҳаммад Салоҳ яқинда берган шов-шувли интервьюси туфайли "Ливерпуль" билан Миланга учмади. Юлдуз футболчининг "қизиллар" сафига қачон қайтиши ҳозирча маълум эмас. Мисрлик футболчи 2017 йилнинг ёзидан буён клуб шарафини ҳимоя қилиб келмоқда.
