Лондоннинг "Арсенал" клуби ҳужумчиси Габриэль Жезус майдонга қайтганидан сўнг журналистлар билан суҳбатлашди.
28 ёшли футболчи Чемпионлар лигаси доирасида Бельгиянинг "Брюгге" клубига қарши кечган ва "канонирлар" 3:0 ҳисобида ғалаба қозонган ўйинда захирадан майдонга тушди. Бу бразилиялик футболчи учун январь ойидан бери илк ўйин бўлди - у жароҳат туфайли 322 кунни ўтказиб юборди.
"Мен тайёрман. Ҳамма менинг голимни кутарди ва мен, албатта, гол уришни хоҳлардим. Аммо ниҳоят қайтганимдан ва ўйнай олганимдан жуда хурсандман," - дея Жезуснинг сўзларини келтиради журналист Фабрицио Романо.
Шанба куни Микель Артета жамоаси Премьер-лиганинг 16-турида ўз уйида "Вулверхэмптон"ни қабул қилади.
