«Негрейранинг иши» бўйича хусусий айбловчи сифатида иштирок этаётган Мадриднинг "Реал" клуби юристлари 12 декабрь, жума куни бўлиб ўтган суд мажлисида "Барселона" президенти Жоан Лапортани сўроқ қилишди. Бу ҳақда AS хабар бермоқда.
Манбага кўра, "қаймоқранглилар" ҳуқуқшунослари Лапортадан Судьялар техник қўмитаси (CTA) собиқ вице-президенти Хосе Мария Негрейра учун тўловларнинг 800 фоизга оширилиши сабаблари, Негрейранинг ўғли "кўк-анорранглилар" учун ҳакамлар ҳисоботларини тайёрлашда иштирок этгани ҳақида сўрашган. Бундан ташқари, "Реал" юристларини "Барселона" нима учун тўловларни солиқ органларидан яширгани ва уларнинг асл келиб чиқиши қизиқтирган.
Эслатиб ўтамиз, 2023 йилда "кўк-анорранглилар" Испания Қироллик футбол федерациясида (RFEF) ишлаган Негрейрага пора беришда айбланган эди. "Барселона" 2001 йилдан 2018 йилгача тахминан 8,4 миллион евро миқдорида кўрсатилган тўловларни амалга оширганликда айбланган.
