«Negreyraning ishi» bo‘yicha xususiy ayblovchi sifatida ishtirok etayotgan Madridning "Real" klubi yuristlari 12 dekabr, juma kuni bo‘lib o‘tgan sud majlisida "Barselona" prezidenti Joan Laportani so‘roq qilishdi. Bu haqda AS xabar bermoqda.
Manbaga ko‘ra, "qaymoqranglilar" huquqshunoslari Laportadan Sudyalar texnik qo‘mitasi (CTA) sobiq vise-prezidenti Xose Mariya Negreyra uchun to‘lovlarning 800 foizga oshirilishi sabablari, Negreyraning o‘g‘li "ko‘k-anorranglilar" uchun hakamlar hisobotlarini tayyorlashda ishtirok etgani haqida so‘rashgan. Bundan tashqari, "Real" yuristlarini "Barselona" nima uchun to‘lovlarni soliq organlaridan yashirgani va ularning asl kelib chiqishi qiziqtirgan.
Eslatib o‘tamiz, 2023 yilda "ko‘k-anorranglilar" Ispaniya Qirollik futbol federasiyasida (RFEF) ishlagan Negreyraga pora berishda ayblangan edi. "Barselona" 2001 yildan 2018 yilgacha taxminan 8,4 million yevro miqdorida ko‘rsatilgan to‘lovlarni amalga oshirganlikda ayblangan.
