13 декабрь куни Лига бош директори Диёр Имомхўжаев Сирдарё вилояти ҳокими Эркинжон Турдимов билан учрашди. Унда янги ташкил этилаётган «Гулистон» клубининг Лига байроғи остидаги мусобақаларда иштирок этиш масаласи муҳокама қилинди.

Аввалроқ Эркинжон Турдимов мазкур масалани амалга татбиқ этиш масаласида вилоят Касаба уюшмасига раҳбарлик қилаётган Ойбек Ашурматов билан суҳбатлашган бўлиб, шу аснода Ойбек Шодмонқулович Лига офисига ташриф буюрганди. Қайд этиш керак, Ашурматов Сирдарё вилояти ҳокими сифатида фаолият олиб борган даврда «Гулистон» клуби 2013 йилги мавсумни Олий лигада ўтказганди.

«Гулистон» клуби Сирдарё вилояти футбол ассоциацияси қошида ташкил этилади. У 2026 йилги мавсумда Лига аъзолигига қабул қилиниши ва илк мавсумни Биринчи лигада ўтказиши масаласи Эркинжон Турдимов билан учрашувда келишиб олинди. Бу йўлда ҳар қандай масала босқичма-босқич амалга оширилиши мақсадга мувофиқ эканлиги таъкидлаб ўтилди.

Сир эмаски, Биринчи лигада Сирдарё вилояти шарафини икки мавсумдан буён вилоят футбол академиясининг спорт клуби ҳимоя қилиб келмоқда ва у ўзининг уй учрашувларини Янгиер шаҳрида ўтказади. «Гулистон» клуби ҳам Гулистон шаҳридаги стадион Лига томонидан қабул қилиб олингунига қадар Янгиердаги стадиондан фойдаланиши режалаштирилган.

Эркинжон Оқбўтаевич мамлакат футболи ривожига катта ҳисса қўшиб келаётган инсон сифатида Лига томонидан қадрланади. Навоий, Сурхондарё, Самарқанд вилоятларида ҳоким бўлиб ишлаган вақтида Турдимов "Қизилқум", "Сурхон", "Динамо" каби клублардаги ислоҳотларга бевосита сабабчи бўлган.

Икки ярим йил муқаддам томонлар ўртасидаги ўзаро учрашувдан кейин Самарқанддаги "Динамо" стадиони майдони тўлиқ таъмирдан чиқарилиб, унинг дренаж ва суғориш тизими, майсаси Суперлига талабларига мосланган, майдон атрофи резина қоплама билан ўралган, шунингдек, стадион техник зонасида яна бир қатор ишлар амалга оширилганди. Ишонамизки, яна бир неча ойлардан сўнг «Гулистон»да ҳам Лига талабига жавоб берадиган стадион мухлисларни қабул қила бошлайди.