Мадриднинг "Реал" клуби бош мураббийи Хаби Алонсо жамоанинг муаммоси ҳақида фикр билдирди. Якшанба куни "қаймоқранглилар" "Алавес"ни катта қийинчиликлар эвазига мағлуб этишди (2:1).

Учрашувнинг 24-дақиқасида Килиан Мбаппе мадридликларни олдинга олиб чиққан бўлса, 68-дақиқада мезбонлар ҳисобни тенглаштиришга муваффақ бўлди. Учрашув тақдирини Родригонинг 76-дақиқадаги аниқ зарбаси ҳал қилди.

Учрашув якунлангач, журналистлар Алонсодан нега "Реал" ўйинлар давомида диққатини йўқотиб қўяётганини сўрашди.

"Қўшилмайман - ўйинлар ҳар хил бўлади. Бу мавсумда шундай ўйинлар бўлдики, улар давомида бироз секинлашдик, аммо сўнгги учта ўйинда бундай ҳолат кузатилмади," - дея Алонсонинг сўзларини келтиради Madrid Universal.

"Реал" Ла Лига турнир жадвалида 39 очко билан 2-ўринда бормоқда. Пешқадамлик "Барселона"да (43).