Иккинчи давра ўйинларига Тошкентда тайёргарлик кўрган «Олмалиқ» учта назорат ўйинида майдонга тушди.

Дастлабки назорат ўйини «Нефтчи»га қарши ўтказилган эди ва унда Шквирин шогирдлари 0:3 ҳисобида имкониятни бой беришди. «Металлург»га қарши иккинчи ўйинда эса 5:2 ҳисоби қайд этилди ва «Олмалиқ» Зафар Полвонов (дубль), Санжар Шоаҳмедов, Шаҳбоз Эркинов ва Маъмур Абдуллаевнинг голлари эвазига ғалаба қозонди.

«Динамо»га қарши учинчи назорат ўйинида эса 1:1 ҳисоби қайд этилгани ҳақида аввал хабар берилган эди. Ушбу учрашувда, клуб расмий сайти хабарига кўра, бироз бетоблиги сабаб, «Олмалиқ»нинг етакчи ҳимоячиларидан бири Евгений Гоголь майдонга тушмаган.

«Олмалиқ» машғулотларни 2 августгача Тошкентда олиб боради. «Сўғдиёна» билан ўтадиган иккинчи давранинг биринчи ўйинига тайёргарлик Янгиерда давом эттирилади. Эслатиб ўтамиз, жиззахликларга қарши сафарда 4 август, якшанба куни бўлиб ўтадиган учрашувни Ҳасан Рўзиев бошчилигидаги ҳакамлар бригадаси бошқариб боради.