ЖЧ-2026да иштирок этадиган ҳар бир жамоа камида 10,5 миллион долларни қўлга киритиши кафолатланади.

Журналист Бен Жейкобснинг ёзишича, ФИФА кенгаши 2026 йилда бўлиб ўтадиган жаҳон чемпионатини ўтказиш учун рекорд даражадаги 727 миллион доллар ажратган - бу Қатардаги ЖЧ-2022 билан таққослаганда 50 фоизга кўп. Сумма иштирокчи-аъзо ассоциациялар ўртасида тақсимланади, 655 млн доллар эса турнирнинг соврин жамғармасини ташкил этади.

ЖЧ-2026 ғолиби 50 миллион доллар, финалчи эса 33 миллион доллар мукофот пулига эга бўлади. Бронза медали соҳиби 29 млн доллар, 4-ўринни эгаллаган жамоа эса 27 млн доллар ишлаб топади. Чорак финалчиларга 19 млн доллардан, 1/8 финал иштирокчиларига 15 млн доллардан, 1/16 финалга чиққанларга 11 млн доллардан тўланади. Гуруҳ босқичидан чиқиб кетган иштирокчилар 9 миллион доллардан мукофот пули олишади.

Бундан ташқари, ЖЧ-2026 нинг ҳар бир иштирокчиси тайёргарлик харажатларини қоплаш учун 1,5 миллион доллардан олади. Шу тариқа, ҳар бир ассоциация турнирда иштирок этгани учун камида 10,5 млн доллар олади.