Машҳур собиқ футболчи Тьерри Анри Англия Премьер-лигасининг жорий мавсуми ҳақида ўз фикрлари билан ўртоқлашди.
У "Астон Вилла" бош мураббийи Унаи Эмери ҳақида жуда илиқ фикрлар билдирди.
"Мен Унаи Эмерини ҳурмат қилишим керак, чунки буни ҳеч ким кутмаган эди. "Астон Вилла" мавсум бошида жуда ёмон ҳолатда эди - жамоа йўқолиб қолгандек эди. Биз томоша қилардик ва ўйлардик: наҳотки шу якун бўлса? Аммо, Эмери йўлини топди. У мақтовга лойиқ. Эҳтимол, уч ойдан кейин ҳаммаси яна издан чиқиб кетар. Аммо ҳозир Эмери барчани бирлаштира олган", - дея Анрининг сўзларини келтиради Goal портали Betway’га таяниб.
"Астон Вилла" Англия чемпионатини бешта ўйиндан иборат ғалабасиз серия билан бошлади, аммо кейинги 11 ўйинда бирмингемликлар 10 та ғалабага эришди. Айни дамда Эмерининг жамоаси пешқадам "Арсенал"дан 3 очко ортда қолиб, 3-ўринни эгаллаб турибди.
