Туриннинг "Ювентус" клуби сафида тўп тепаётган туркиялик вингер Кенан Йилдиз фаолиятини туманли Альбионда давом эттириши мумкин. Бу ҳақда Teamtalk журналистлари хабар бермоқда.
Манбага кўра, 20 ёшли ҳужумкор ярим ҳимоячининг хизматларига "Манчестер Юнайтед" қизиқиш билдирмоқда. "Қизил иблислар" футболчини сотиб олиш учун 100 миллион евро тайёрламоқда.
Италия чемпионатининг жорий мавсумида Йилдиз "кекса синьора"нинг 14 та ўйинида қатнашиб, бешта гол ва тўртта голли узатмани ўз ҳисобига ёздириб қўйди.
Transfermarkt портали Кенаннинг бозор нархини 75 миллион деб баҳоламоқда. Туркияликнинг "Бьянконерилар" билан меҳнат шартномаси 2029 йилнинг ёзида тугайди.
