«Ливерпуль» ҳужумчи Александер Исак оёқ суягини синдириб олганидан сўнг, жамоа ҳужум чизиғини кучайтириш вариантларини кўриб чиқмоқда. Бу ҳақда Caught Offside хабар бермоқда.
Манбага кўра, мерсисайдликлар «Брентфорд» форварди Игор Тьягони кузатиб бормоқда ва уни Арне Слот жамоаси услубига мос ўйинчи деб ҳисобламоқда. Бироқ «асаларилар» 24 ёшли ҳужумчини қишки трансфер ойнасида сотиш ниятида эмас, агар фавқулодда таклиф бўлмаса.
Шу билан бирга, «Ливерпуль»нинг асосий трансфер мақсади ҳали ҳам «Борнмут» вингери Антуан Семеньо бўлиб қолмоқда. ОАВ бу футболчига қизиқиш Исак жароҳат олишидан олдиноқ мавжуд бўлганини хабар қилган эди.
Шунингдек, эндиликда ярим ҳимоячи Флориан Вирц «Ливерпуль» сафида янада ҳужумкор ролда ҳаракат қилиши мумкин. Слот немис хавбекини «ёлғон тўққизлик» позициясида қўллаши эҳтимолдан холи эмас.













