Иккинчи даврага тайёргарлик кўраётган “Оқ бўрилар” жамоасида машғулотлар ўтказиш жараёнлари билан бирга таркибни шакллантириш ишлари ҳам қизғин олиб борилмоқда.

Аввал хабар берганимиздек, биринчи даврада “Қизилқум” жамоасида ҳаракат қилган Андрей Власичевнинг “Шўртан”га ўтиши ойдинлашди. Клуб раҳбарияти билан олиб борилган музокаралардан сўнг, футболчи шошилинч тарзда Зарафшон шаҳрига бориб келди ва ўзининг трансфери билан боғлиқ ишларини ижобий тарзда ҳал қилди.

Шунингдек, унинг жамоадоши – Элдор Тожибоев ҳам эндиликда ғузорликлар шарафини ҳимоя қилади. “Шўртан” клуби раҳбарияти литвалик дарвозабон Павел Леус хизматидан воз кечгандан кейин унинг ўрнига муносиб номзодни топишга ҳаракат қилди. Дастлаб, асосий дарвозабон Александр Корнейчук билан тенгма-тенг ўйнаш учун тажрибали Темур Жўраев йиғинга таклиф қилинди. Лекин ўз вақтида ном қозонган бу футболчи клуб раҳбарияти ва мураббийлар гуруҳининг талабларига жавоб бера олмади. Шундан сўнг Элдор Тожибоев варианти юзага келди ва бу масала “Шўртан” учун ижобий якун топди.

Ва ҳозирча яна бир янгилик бу – жамоанинг маркази эндиликда Азиз Алижоновга ишониб топширилса ажаб эмас. Негаки, 1 август куни “Оқ бўрилар” сафига “Нефтчи”нинг тажрибали футболчиси келиб қўшилди. Демак, иккинчи даврада “Шўртан” ҳозирги аҳволини анчайин яхши томонга ўзгартириши шубҳасиз.