2013 йилнинг октябрь ойида Осиёнинг тўққиз мамлакатида 2014 йили бўлиб ўтадиган U-19 Осиё чемпионати саралаш баҳслари бўлиб ўтади. ОФК ушбу ўйинларга ўзбекистонлик назоратчи ва ҳакамларни ҳам жалб этди.

Ўзбекистонлик назоратчи ҳакам, ФИФА инструктори Фарҳод Абдуллаев 8-12 октябрь кунлари Хитойнинг Жечианг шаҳрида бўлиб ўтадиган «I» саралаш гуруҳи ўйинларида ишлайди. Ушбу гуруҳда мезбон - Хитойдан ташқари Япония, Малайзия ва Макао ҳам иштирок этади.

Бош ҳакам Владислав Цейтлин ва ён қанот ҳаками Ҳусниддин Шодмонов 4-12 октябрь кунлари Иордания пойтахти Амман шаҳрида бўлиб ўтадиган «В» гуруҳи саралаш ўйинларида ишлайди. Ушбу гуруҳда финал босқичи йўлланмаси учун Иордания, БАА, Яман, Мальдив ва Афғонистон кураш олиб боради.

Ўзбекистонлик ён қанот ҳаками Жаҳонгир Саидов «С» саралаш гуруҳи ўйинларида ишлайди. 8-12 октябрь кунлари Ироқнинг Арбил шаҳрида бўлиб ўтадиган баҳсларга таклиф этилган бош ҳакамлар орасида, маълумот учун, туркманистонлик Чоримурод Қурбонов ҳам бор. Ушбу саралаш гуруҳида, Ироқдан ташқари, Кувайт, Покистон ва Бангладеш терма жамоалари ҳам иштирок этади.

Эслатиб ўтамиз, U-19 Осиё чемпионати саралаш баҳсларида Алексей Евстафеев қўл остидаги 1995 йилда туғилган футболчилардан иборат Ўзбекистон ёшлар терма жамоаси иштирок этади. Қатар мезбонлик қиладиган саралаш баҳсларида Ўзбекистонга, мезбонлардан ташқари, Ҳиндистон, Туркманистон ва Непал рақиб бўлади.