Россиялик боксчи Всеволод Шумков ўзбекистонлик Олимпиада ва Жаҳон чемпиони Абдумалик Ҳалоковга мурожаат йўллади. У 2—13 декабрь кунлари Дубайда бўлиб ўтган Жаҳон чемпионати финалида юз берган “қулоқ тишлаш” воқеаси бўйича гапирар экан, Ҳалоков билан реваншга тайёр эканлигини билдирди.

“Барча бокс мухлисларига, хусусан ўзбекистондагиларга мурожаат йўлламоқчиман. Мен ўзбек халқини жуда ҳурмат қиламан, чунки у ерда мени қўллаб-қувватлайдиган кўплаб мухлисларим ва дўстларим бор. Менга Ҳалоков билан реванш жанги таклиф қилинганда, иккиланмасдан рози бўлдим. Ҳатто рақибимнинг ватани — Тошкентда ҳам чемпионликни ҳимоя қилишга тайёрман. Ҳар қандай шароитда, ҳар қандай жойда чиройли ва ажойиб бокс намойиш эта олишимга ишонаман, ҳеч ким ғалабамга шубҳа қилмасин. Афсуски, сиёсий сабабларга кўра жамоамиз Ҳалоков олтин медал олган Олимпиадада қатнашмади. Ҳозир эса Жаҳон чемпионатида жамоамиз иштирок этганида натижа бутунлай бошқача бўлганини исботладик. Абдумалик, кел, чиройли бокс намойиш этайлик. Жавобингни кутаман”, дейди Шумков ўзининг Instagram саҳифасида.

Аввалроқ, Халқаро бокс ассоциацияси (IBA) Дубайда бўлиб ўтган Жаҳон чемпионати финал жангига оид расмий маълумотни эълон қилган эди. −60 кг вазн тоифасида ўтган Абдумалик Ҳалоков ва россиялик Всеволод Шумков ўртасидаги финал жанги давомида рақиб боксчи ўзбекистонлик чарм қўлқоп устасининг қулоғини тишлаб олган эди. IBA хабарига кўра, ушбу ҳолат тасодифий деб топилган ва жанг натижасига таъсир кўрсатмаган. Шу сабабли финал баҳсининг натижаси ўзгаришсиз қолдирилган.