Испаниянинг "Жирона" ва Англиянинг "Астон Вилла" клублари "Барселона" дарвозабони Марк-Андре тер Штегенни жорий мавсум якунига қадар ижарага олишга қизиқиш билдирмоқда, деб хабар беради Marca.
Нашр маълумотига кўра, германиялик посбон барқарор ўйин амалиётига эга бўлиш мақсадида Каталония клубини вақтинча тарк этиш вариантини кўриб чиқмоқда.
Асосий мотивация - 2026 йилги жаҳон чемпионати арафасида Германия терма жамоаси таркибида мустаҳкам ўрин олиш истаги. Қайд этилишича, клубда мунтазам ўйин амалиёти олмаса, Бундестим устози Юлиан Нагельсманн уни термага чақирмаслиги мумкин.
Мавсумнинг биринчи ярмини тер Штеген белидаги муаммолар туфайли ўтказиб юборди. Қайта тикланганидан сўнг, у Испания кубоги доирасида фақат битта ўйин ўтказишга муваффақ бўлди, бу эса унинг ўйин амалиёти учун ижарага кетиши мумкинлиги ҳақидаги гап-сўзларни кучайтирди.
