Ispaniyaning "Jirona" va Angliyaning "Aston Villa" klublari "Barselona" darvozaboni Mark-Andre ter Shtegenni joriy mavsum yakuniga qadar ijaraga olishga qiziqish bildirmoqda, deb xabar beradi Marca.

Nashr ma’lumotiga ko‘ra, germaniyalik posbon barqaror o‘yin amaliyotiga ega bo‘lish maqsadida Kataloniya klubini vaqtincha tark etish variantini ko‘rib chiqmoqda.

Asosiy motivasiya - 2026 yilgi jahon chempionati arafasida Germaniya terma jamoasi tarkibida mustahkam o‘rin olish istagi. Qayd etilishicha, klubda muntazam o‘yin amaliyoti olmasa, Bundestim ustozi Yulian Nagelsmann uni termaga chaqirmasligi mumkin.

Mavsumning birinchi yarmini ter Shtegen belidagi muammolar tufayli o‘tkazib yubordi. Qayta tiklanganidan so‘ng, u Ispaniya kubogi doirasida faqat bitta o‘yin o‘tkazishga muvaffaq bo‘ldi, bu esa uning o‘yin amaliyoti uchun ijaraga ketishi mumkinligi haqidagi gap-so‘zlarni kuchaytirdi.