Ўзбекистон терма жамоасининг собиқ бош мураббийи Вадим Абрамов Қозоғистоннинг «Астана» футбол клубидаги иш тажрибаси ҳамда жамоа раҳбарияти таклиф қилган жуда катта шартнома ҳақида гапириб берди, дея хабар қилади Sports24.kz.

— «У ерда бир ҳафта бўлдим, кўриб чиқдим. Менга жуда яхши шартнома таклиф қилишди. Уни очиқ айтишим мумкин — бир миллион доллар. Нега кетдим? Биринчи саволим шу бўлди: бизда футболчилар борми? Маълум бўлишича, жамоада умуман ўз футболчилари йўқ экан. Ҳаммаси ижарада, вазифа эса — биринчи ўринни олиш. Сиз ақли жойида инсон бўлиб, шундай шартномани имзолайсизми? Фақат бир миллионни олиш учун — бу бир гап. Балки кейинчалик имзоламаганимга афсусланганман ҳам, лекин ўша пайтда мен фақат бир нарсани сўрадим: футболчилар қаерда? Клуб директори этиб тайинланган одам футболдан жуда йироқ эди. У буни англаб етди ва бир ҳафтадан сўнг ариза ёзиб, бошқа лавозимга ўтиб кетди. Шунда менга қолишдан қандай маъно бор эди? Ростини айтсам, у ерда жуда совуқ ҳам эди, Тошкентга қайтгим келиб қолди», — деди Абрамов «Финт Тураева» YouTube-каналидаги подкастда.

Вадим Абрамов 2013 йилда пойтахт клуби «Астана»нинг бош мураббийи лавозимини эгаллаган, аммо орадан кўп ўтмай жамоани тарк этган. Қайд этиш жоизки, ўша пайтда «Астана» раҳбари лавозимида Есмухамет Спанов фаолият юритган ва у ҳам Вадим Абрамов клубдан кетганидан сўнг ўз лавозимини тарк этган.

Вадим Абрамовга келадиган бўлсак, унинг раҳбарлиги остида Ўзбекистон миллий терма жамоаси 2011 йилги Осиё кубогида тўртинчи ўринни эгаллаган. 2014 йилги жаҳон чемпионати саралаш босқичида эса терма жамоа ҳал қилувчи финал раундигача етиб борган.