O‘zbekiston terma jamoasining sobiq bosh murabbiyi Vadim Abramov Qozog‘istonning «Astana» futbol klubidagi ish tajribasi hamda jamoa rahbariyati taklif qilgan juda katta shartnoma haqida gapirib berdi, deya xabar qiladi Sports24.kz.

— «U yerda bir hafta bo‘ldim, ko‘rib chiqdim. Menga juda yaxshi shartnoma taklif qilishdi. Uni ochiq aytishim mumkin — bir million dollar. Nega ketdim? Birinchi savolim shu bo‘ldi: bizda futbolchilar bormi? Ma’lum bo‘lishicha, jamoada umuman o‘z futbolchilari yo‘q ekan. Hammasi ijarada, vazifa esa — birinchi o‘rinni olish. Siz aqli joyida inson bo‘lib, shunday shartnomani imzolaysizmi? Faqat bir millionni olish uchun — bu bir gap. Balki keyinchalik imzolamaganimga afsuslanganman ham, lekin o‘sha paytda men faqat bir narsani so‘radim: futbolchilar qayerda? Klub direktori etib tayinlangan odam futboldan juda yiroq edi. U buni anglab yetdi va bir haftadan so‘ng ariza yozib, boshqa lavozimga o‘tib ketdi. Shunda menga qolishdan qanday ma’no bor edi? Rostini aytsam, u yerda juda sovuq ham edi, Toshkentga qaytgim kelib qoldi», — dedi Abramov «Fint Turayeva» YouTube-kanalidagi podkastda.

Vadim Abramov 2013 yilda poytaxt klubi «Astana»ning bosh murabbiyi lavozimini egallagan, ammo oradan ko‘p o‘tmay jamoani tark etgan. Qayd etish joizki, o‘sha paytda «Astana» rahbari lavozimida Yesmuxamet Spanov faoliyat yuritgan va u ham Vadim Abramov klubdan ketganidan so‘ng o‘z lavozimini tark etgan.

Vadim Abramovga keladigan bo‘lsak, uning rahbarligi ostida O‘zbekiston milliy terma jamoasi 2011 yilgi Osiyo kubogida to‘rtinchi o‘rinni egallagan. 2014 yilgi jahon chempionati saralash bosqichida esa terma jamoa hal qiluvchi final raundigacha yetib borgan.