Аввалроқ «Ливерпуль» ва «Бавария»да тўп сурган, ҳозирда Саудия Арабистонининг «Ан-Наср» клуби вингери бўлган Садио Мане Африка миллатлар кубоги ўйинларида Сенегал терма жамоаси сафида ўзининг 10-голини киритди. Бу ҳолат мусобақанинг гуруҳ босқичи 2-турида Конго ДР терма жамоасига қарши ўйинда содир бўлди (1:1).
Opta Sports статистик Telegram-канали хабар беришича, XXI асрда Африка миллатлар кубогида Манедан кўпроқ гол урган футболчилар фақат иккита: Камерун терма жамоаси сафида тўп сурган Самуэль Это’о (14 та гол) ва Кот-д’Ивуар терма жамоаси учун ўйнаган Дидье Дрогба (11 та гол).
Садио Манега ҳозир 33 ёш. У 2012 йилда Сенегал терма жамоасида дебют қилган. Шу вақт ичида у 119 та ўйинда майдонга тушиб, 51 та гол муаллифи бўлган.
Африка миллатлар кубоги. D гуруҳи. 2-тур
27 декабрь 2025 йил, шанба.
Сенегал — ДР Конго — 1:1
Голлар: 0:1 — Бакамбу (61), 1:1 — Садио Мане (69)













